Pasi grupi militant palestinez Hamas nisi një numër të madh raketash drejt Izraelit, vendi u mbështet përsëri tek sistemi i mbrojtjes kundër raketave “Iron Dome”.

Sipas CNN, “Iron Dome” është një nga mjetet më të rëndësishme në arsenalin e Izraelit që ka shpëtuar jetë të panumërta gjatë konflikteve të ndryshme gjatë dekadës së fundit.

Është një sistem shumë efektiv dhe Forcat e Mbrojtjes së Izraelit (IDF) njoftuan në maj se Iron Dome kishte një shkallë suksesi prej 95.6 për qind gjatë sulmeve me raketa nga grupi militant palestinez Xhihadi Islamik.

Sistemi i lëvizshëm i mbrojtjes ajrore përbëhet nga 10 bateri, secila prej të cilave mban tre deri në katër raketahedhëse.

Zhvillimi i Iron Dome filloi në vitin 2007, dhe pas testimit në 2008 dhe 2009, bateritë e para u vunë në punë në vitin 2011, ndërsa sistemi është përmirësuar disa herë që atëherë.

“Iron Dome” është projektuar për të rrëzuar raketat në hyrje dhe është e pajisur me një radar që zbulon raketat brenda një rrezeje prej katër deri në 70 kilometra, më pas përdor një sistem komandimi dhe kontrolli që llogarit shpejt nëse një raketë në hyrje është një kërcënim apo ka gjasa të godasë një zonë e papopulluar.

Nëse raketa përbën një kërcënim, sistemi lëshon raketa për ta shkatërruar atë në ajër.